كلمات بروفيشنال ج2

عزيزى القارئ إليك الجزء الثانى من قاموس بروفيشنال-عربى الوسيط لادارة الاعمال البروفيشنال

صباح الخير = السلام عليكم

ازيكم عاملين ايه؟ = أخبار الشغل اللى فى ايدك ايه؟

أنا عارف انك مضغوط و تعبان ربنا معاك = مش معنى انك تعبان انى مش هقف على دماغك.. انجزنى

عملتوا ايه فى الموضوع الفلانى؟ = ده انا هطلع ميتين أهلك انك لسه ماخلصتوش

انا موافق بس هكلم استاذ خليل عشان هو اللى فى ايده الموضوع = استاذ خليل يبقى يلبسها فى مصيلحى بقى

أنا تعبت من كتر الشغل = انا بقالى اسبوع مش بعمل حاجة و بقرأ جرايد

معلش خليك معايا ساعدنى فى الشغل ده = اعمل شغلى عقبال مارتاح انا شوية

ازيك يا جميل عامل ايه؟ = انجز و جر معايا ناعم عشان عايزك فى مصلحة

عينيا الاتنين حاضر = روّح لأمك مش هعمللك حاجة

حاضر هقول لاستاذ خليل = انا وش هنفض لك و اخبط راسك فى الحيط

لو عايز منى حاجة كلمنى = ماتبعتليش ايميل مش هلبس انا دليل انك طلبت حاجة خليها ماشية بالحب

أنا مش فاضى مش هعرف اعمل ده دلوقت خليها بكرة = مش عارف اعدى المرحلة دى فى candy crush

انت طلبت أكل من غيرى يا ندل! = انا أساساً واكل بس داخل فيك شمال عشان مابانش انى بعتك

انا مليش دعوة لو عايز حاجة كلم المدير بتاعى يعملهالك = أنا بيضة شمال و شغلك مش هيمشى

احنا عايزين نتعاون عشان الشغل يطلع كويس = احنا اتزنقنا و لازم نساعد بعض و الا هنلبس جامد

انتهى البث و الاذاعة

طاب يومكم

كلمات بروفيشنال ج1

عزيزى القارئ إليك بعض المصطلحات التى تُذكر فى كتابة البريد الالكترونى فى العمل و معناها الصحيح فى اللغة العربية

Dear sir, Good Morning = "حبيب قلبى عايزك فى مصلحة يا كبير"

FYI (For Your Information) = "الخازوق ده مش ليك بس لازم تتفرج عليه"

Best Regards, = "بالشفا يا كبير البس"

Concerning your request = "حضرتك الطلب بتاعك ده تلفه و تحطه فى درجك"

As per our discussion = "مش هلبس فى القرار ده لوحدى"

I will consider your request = "هفكر فى الموضوع ده و معنى انى هفكر انى هفكس لك تماماً"

For your kind review and feedback = "لو ماردتش على الايميل يبقى انت اللى لبست المسئولية لوحدك"

Please, advise = "انا مش هاخد قرار و البس يا عم اعملها لوحدك"

For your esteemed company = "انجزوا بقى يا شركة معفنة"

Kind reminder = "انجز يا روح أمك"

Thank you / I appreciate your efforts = "ده انت طلعت عين أهلى"

Kindly find the attached file = "الملف اللى انت قارف اهلى بيه اهو فى الايميل"

Unfortunately = "فكك منى انا مش فايق للهرى ده"

Best of luck = "اذهب الى الجحيم .. تباً لك"


انتهى البث و الاذاعة

طاب يومكم